NBA頭炮即晒冷 型男陪你過聖誕
等到頸都長，經歷149日停擺之後，新季NBA終於Tip Off！聖誕節一直是NBA最搵錢的檔期，單是門票及轉播費都「億億聲」，難得揭幕日與聖誕節二合為一，聯盟決定於Boxing Day大晒冷，等各位籃球躉由晚到朝睇勻勒邦占士、魯域斯基、高比拜仁、戴歷羅斯、安東尼及基斯保羅等一眾型男，爭做MVP打生打死，其中湖人對公牛及紐約人撼塞爾特人更加是「貴」氣逼人！
85%球迷最期待「湖公戰」
千呼萬喚終於回歸，新季NBA常規賽縱然由82場縮水至66場，但經歷馬拉松式勞資談判後反而令Fans更期待。聯盟為挽回流失球迷，特意安排5場不同時段且分量十足的聖誕大戰在今晚上演，小牛對熱火的上屆「總決賽翻版戰」固然夠睇頭，不過原來美國當地球迷更期待湖人硬撼公牛。
據《ESPN》的調查顯示，高達85%球迷認為5場聖誕大戰當中，以「湖公戰」最具欣賞價值。上季常規賽MVP戴歷羅斯乃新紮球王，季前剛與公牛續約5年總值9,400萬美元的巨額合約，當然希望改朝換代，取代「後波神時代」Icon高比拜仁的籃壇第1人位置。上季聖誕大戰，湖人的門票被炒到過萬美元1張，今戰隨時炒得更貴。
「紐塞戰」靚位波飛炒到3萬9
不過講到貴飛，紐約人都算食水深，據《紐約每日新聞》透露，「紐塞戰」的場邊靚位竟炒到5,036美元（約3.9萬港元）1張，麥迪遜公園球場的平均票價亦高達434美元（約3,374港元），然而球迷依然爭住撲飛，前日開始已沒有連位賣。至於基斯保羅夥拍格芬進襲勇士、杜蘭特率領雷霆火併杜域侯活領軍的魔術亦同樣精彩，今晚由天黑睇到天光，興奮程度就同拆禮物一樣興奮！
