公牛孖寶場內場外贏晒

「公牛孖寶」贏波贏民心！昨晚在澳門威尼斯人度假村金光綜藝館上演的「美國傳奇球星亞洲之旅─澳門站」表演賽，洛文及柏賓率領摩西斯馬龍隊以143:139擊敗阿治巴特隊，年屆50歲的「妖蟲」雖然「跑唔郁」，但全場不斷送禮卻贏盡球迷呼聲；至於「二哥」柏賓就寶刀未老，剷籃、助攻、遠射瓣瓣有，風采依然！

計劃明年搞中國站表演賽

昨仗表演賽雖然「坐唔滿」，但當入場球迷看見一位又一位經典球星進場依然情緒高漲，當中以「公牛孖寶」洛文及柏賓最受歡迎，每當2人控球時，現場均掌聲雷動。年事已高的洛文礙於體能跑動極少，下半場幾乎沒有落場，不過「妖蟲」每次Time Out時都有將簽名波鞋及波衫拋向觀眾席，勁識搞氣氛！至於柏賓多次轟入3分球之餘更助攻助守，帶領球隊砌低由夏達威及佩頓領軍的阿治巴特隊，不過無論誰勝誰負，單是如此星光熠熠陣容已令一眾入場球迷收貨。

「美國傳奇球星亞洲之旅─澳門站」曲終人散，搞手之一吳先生（Rock）對各界的熱烈反應及支持感安慰，被問到今次經典球星的戲金，Rock只向記者透露柏賓及洛文的戲金為眾星之冠，價錢是高到難以置信。

Rock表示：「柏賓嘅戲金同邀請1名現役球星幾乎一樣，鬼叫自己鍾意佢咩？今次表演賽平手離場心滿意足，唔求賺大錢。」據Rock透露，他已計劃再次召集經典球星於明年4或5月展開中國站表演賽，各位籃球躉記住留意！