西班牙贏多場捧盃

台維斯盃周五假塞維利亞爆發終極王者爭霸，主隊西班牙由「野獸」拿度及「體力王」費利亞掛帥出戰單打賽事，兩人在國王卡洛斯親臨打氣下有精彩表現，雙雙奏捷，大分暫以2:0領前阿根廷，爭冠前景一片光明。

國王卡洛斯睇波掛住Send短訊

早前在年終賽後勁不繼分組賽出局的拿度，返回泥地場「成個生晒」，為國爭光即使面對情同兄弟的蒙納哥亦「冇情講」，終以6:1、6:1、6:2的一面倒優勢，為西班牙先拔頭籌。國王卡洛斯雖被《機密報》踢爆比賽期間狂Send喪睇手機短訊，似未專心觀戰，但他賽後還親自到更衣室祝賀拿度。

出名打不死的費利亞緊接上陣火併前美網冠軍博迪奧，在落後1:2劣勢下以6:2、6:7（2:7）、3:6、6:4、6:3成功逆轉，西班牙在5場3勝制賽事只要再贏一場，便可第5度捧盃。

拿度賽後說主場28,000名球迷令他興奮：「我喜歡打主場，因為氣氛一流，猶如一場足球大戰，可是我為蒙納哥感到不開心，因為他是我的好友呢！」西班牙對上一次捧盃是2009年，「鬥牛國」在台維盃擁有地獄主場，過去12年未逢一敗，加上以往只得澳洲在1939年落後兩場能反勝，阿根廷今次凶多吉少。