女子隊焗拍性感年曆自救

求人不如求己！西乙球隊阿爾巴塞特早排深陷財政危機，最終得到身為鄉里嘅巴塞巨星恩尼斯達入股打救，總算重現生機。不過，唔知「小白」係咪重男輕女呢，同樣缺乏資金嘅阿爾巴塞特女子隊就冇人理，最終呢班鬥牛英雌選擇除衫自救，拍攝性感年曆搵錢，勇氣同決心同樣值得支持。

咪以為個個係女波牛，梗係醜樣腿粗乜都有，查實佢哋話晒都係運動員，身材Keep得不知幾咁Fit，加埋專業嘅化妝同攝影，成份年曆即使拍埋一眾娛樂圈姐仔度都絕對唔輸蝕。至於話搞到要除衫「賣肉」籌錢，其實又唔係想像中咁慘情，喺阿爾巴塞特體育城召開嘅記者會上，佢哋個發言人就話：「今次拍攝係一個好有趣嘅經驗，大家都好享受！」唔知「小白」睇到，會唔會買番一千幾百份，送畀親朋好友以示支持母會呢？

飛燕諾「出賣」女Fans籌球迷會經費

同樣要拍性感年曆籌款，仲有就係來自荷甲飛燕諾嘅球迷會，佢哋今次搵嚟18位索爆女球迷參與拍攝，出售年曆所得嘅收益，將會撥作球迷會活動諸如印製橫額、購買煙花同安排音樂播放等之用。據知，今次初步印製嘅500份年曆之中，有近一半已經得到球迷會內部會員搶先訂購，有份做年曆Model嘅20歲索女希絲迪克信心十足咁話：「我諗由靚女拍攝嘅年曆，應該受歡迎過用飛燕諾球員做主角嗰啲啩！」

其實以往飛燕諾球迷會嘅營運資金，一樣都係喺會員活動上進行籌款，不過佢哋球迷會負責人雲達賀雲就話：「我哋唔可以成日伸手問人攞錢嘛，間中都要畀啲回報大家！」有性感喺手，相信大家畀錢都畀得更疏爽啦！