NBA球星玩慈善賽 幫奧巴馬搵經費

美國總統奧巴馬係超級籃球迷，根據ESPN消息人士大爆，奧巴馬邀請到大批現役同退役NBA球星，12月12號喺首都華盛頓進行慈善明星賽，為奧巴馬嚟緊嘅總統大選籌募經費順便造勢，而且新世代球星杜蘭特、基斯保羅同杜域侯活已答應撐場，相當有睇頭。

海外球迷最冧高比仔

奧巴馬競選委員會表示，表演賽門票暫時未公開發售，又大賣關子唔確定奧巴馬到時係咪現身，不過呢位總統先生出名愛籃球，開到聲大把NBA球員幫手，據講現役球星中杜蘭特、基斯保羅、杜域侯活、卡特同巴朗戴維斯已答應參加表演賽，退役球星中暫時以莫寧知名度最高。

由於NBA停擺，搵球星出席活動自然更容易，但最近有更多球員計劃到海外打波搵錢，網站《HOOPSHYPE》喺Facebook發起投票「你最希望邊個NBA球星去你國家打波」，結果高比拜仁以36.5%高票當選No.1，跟住係魯域斯基、戴歷羅斯、杜蘭特同韋迪，勒邦占士得5.8%得票率排第6位，形象插水輸高比幾條街。