羅意庭期待再戰易建聯

中國職籃下周六殺埋身！NBA停擺，造就一眾「逃兵」空降CBA，焦點所在乃「金塊孖寶」簡安馬田、JR史密夫及回流的易建聯。同為港人熟悉的「二年生」羅意庭亦備受關注，這位「港籃之子」昨日趁周末假期，特意返港剪髮，以全新形象迎接CBA之餘，更豪言希望盡快再與易建聯一較高下！

明日是羅意庭的24歲生日，奈何CBA開鑼在即，故此「阿庭」只能趁周末返港享受兩天短假期，今晚便要飛返福建向球會報到，未能與家人慶生。「阿庭」今次返港除了敍天倫，最重要是剪髮，原來羅意庭對內地髮型屋甚抗拒，每次返港，他定會由將軍澳寓所「遠赴」荃灣，幫襯自中二便開始光顧的相熟髮型屋。

雞同鴨講 最怕大陸髮型屋

「阿庭」接受本報專訪時透露：「可能自己普通話唔好，試過喺內地同髮型師講完要求，但剪出嚟完全唔係嗰回事，所以都係返香港剪好啲。」昨日羅意庭更帶埋家人一起去理髮，把握時間與家人暢敍。

隨着NBA停擺，易建聯及簡安馬田等球星會空降CBA，作為「二年生」的羅意庭，認為停擺令CBA「上位」：「有更多人關注CBA，自己都會更積極，能夠挑戰NBA球員係一種光榮。」7年前羅意庭曾於亞洲盃外圍賽與易建聯交手，「阿庭」希望盡快與回巢廣東宏遠的「阿聯」再次較量，亦預期作客廣東會非常惡打。

季前賽出席記招 地位提升

上星期潯興有3場季前賽，正選登場的羅意庭場均有逾20分鐘上陣時間，賽後更被教練選中出席記者會，足證他在球隊的地位日漸提升。對於新季目標，「阿庭」表示：「我會用表現嚟爭取上陣時間，作為職業球員，每場波都要做好準備，就算坐足29場冷板櫈，第30場被派上陣都要交足功課。」

CBA資多啲

參賽球隊：17支

常規賽展開日期：11月19日

常規賽：共272場

全明星賽日期：2012年2月18日及19日

全明星賽地點：廣州國際體育演藝中心

季後賽展開日期：2012年2月22日

羅意庭

敍天倫

阿庭專程返港理髮，以新形象迎接新季CBA。

阿庭同潯興班隊友勁Friend，合照嗰陣仲夾埋整古做怪添。