混血E神Monna 掟手榴彈勁過戴納

講起英超嘅史篤城，相信大家一定第一時間諗起戴納掟「手榴彈」，點知原來有人掟界外球仲勁過戴納，仲隨時掟到你流鼻血，佢係邊個？之唔係「混血E神」林宜芝（Monna）囉，今日佢會為大家示範「愛美神飛彈」，各位快啲攞定紙巾接招啦！

Monna近期喺o靚模界極速竄紅，全因呢位靚女身形高挑骨架靚到暈，五官標致之餘，一對眼睛仲好似識笑一樣。雖然自細唔鍾意做運動，但係眼見球壇多靚仔，所以Monna同好多女仔一樣，都有留意大型足球盛事，而且對「手榴彈」情有獨鍾，知道小記今日教佢掟界外球，佢開心到跳晒舞，拎起個波亂咁掟，不過Monna姐又趷腳個波又唔過頭，落到場唔畀球證吹罰至奇啦！

趕走byebye肉大叫好玩

於是小記就化身足球導師，將關於掟界外球嘅規則講畀Monna聽，估唔到Monna一點就明，抽起自己件小背心，之後抹乾淨個波，將個波擺喺後腦，踏順步韻雙手拉直向前一掟，小記眼前即時好似見到「鬼影變幻球」咁，有好多個波飛埋嚟，好彩最後都避得切，唔係肯定食硬Monna嘅波餅。

一學識已經咁勁，Monna大叫好玩！仲靈機一觸，話掟界外球掟得多手臂唔會粗之餘，仲可以趕走byebye肉喎。見你咁有恒心，好啦，小記下次踢波叫埋你啦，有你在陣掟界外球，我哋班波一定Sure Win！

中德混血兒參加工展小姐成名

現年24歲嘅Monna林宜芝係中德混血兒，加上身材出眾，故有「混血E神」之稱。07年參加第41屆香港工展小姐一炮而紅，連奪亞軍、最上鏡小姐同最佳口才獎，之後從事Model工作，今年書展同Iris鍾采羲推出寫真集《What's up》，繼而拍攝電影，仲密密到各地夜店做DJ打碟，今次接受我哋訪問亦都嘗試客串做體育主播，估唔到佢報道新聞時咬字清晰又夠生鬼，第時有時間，記得返嚟ONTV客串，點擊率肯定爆燈呀！

骨肉勻稱全靠Shopping

Monna骨肉勻稱，全身毫無贅肉，小記心諗佢一定成日做運動！點知Monna竟然答我冇，話自己咁弗其實全靠Shopping﹕「唔好睇小Shopping呀，我每次閒閒哋都行幾個鐘，仲拎住幾袋戰利品，運動量都好高o架！另外我間唔中都有去遊船河，雖然唔識游水，但就好想試吓啲刺激嘅水上運動。」

咁Monna有冇睇波呢？「因為我有4分1德國人血統，所以每逢大賽都特別留意德國，舊年佢哋喺世界盃好犀利，阿根廷有美斯都唔夠踢，見住德國係咁入波，真係好開心。最衰臨尾輸畀西班牙，如果德國攞世界盃，我嗰晚肯定瞓唔着！」

認識Monna

中文名：林宜芝

出生日期：87/04/28

星座：金牛座

三圍：34E-25-35

身高：167cm

體重：50kg