吳安儀自我增值重返校園好興奮

吳安儀變身「四眼書蟲」！年僅20歲已貴為兩屆世界冠軍的香港CUE后吳安儀，眼見桌球於下屆亞運會或被剔除，深明「花無百日紅」的道理，遂趁後生於新學年背起書包重返校園，自我增值，力求做個有文化的世界冠軍！

吳安儀入讀香港專上教育學院長沙灣黃克競分校，修讀為期兩年的工商管理基礎文憑兼讀課程。剛開學兩周，闊別校園3年再做學生的她坦言「好興奮」：「再讀番書都冇唔習慣，反而感覺充實了，一星期上3晚堂，唯一擔心係唔夠attendance（出席率），畢唔到業。」

「安儀」經常集訓比賽「周圍飛」，體院正代其向校方申請豁免出席率，她表示為了「讀番書」願意辛苦一點兼顧桌球及學業：「其實一直都想讀番書，但拖到今年知道再無會考，將來要再升學可能要靠新學制，加上我想如果有日桌球不再是精英項目，或自己突然打唔到波，也應該要有另一出路及選擇，始終打波唔可以打成世。」

會考1分唔後悔

憑電腦考E，為「安儀」當年會考取得1分，但回望過去她未言後悔：「我絕對唔係勤力嘅學生，當年掛住打波無心機讀書，不過諗番轉頭若果唔係花時間追尋自己桌球理想，亦都唔會突然知道讀書原來真係咁重要。」

「四眼妹」近日狀態不穩，昨於「2011香港女子英式6個紅球公開賽」季軍戰以3:4不敵隊友蘇文欣，幸以一桿71度的最高度數奪走1,000元獎金，總算有點安慰。比賽雖然失利，但獲拍拖半年的男友上前安慰後即笑逐顏開，「安儀」亦大方公開男友身份：「我哋喺桌球室認識，大家有同樣興趣，其餘就係秘密喇！」

走堂赴英打排名賽

「安儀」明日將與3名隊友赴英備戰排名賽，剛開學即要走堂，她透露會帶書「惡補」：「成日上唔到堂擔心跟唔上，不過體院會安排補習老師，自己就帶商科參考書去溫習。」未來兼顧打波和讀書，小妮子希望順利畢業繼續考上大學，即使「四眼」度數加深亦在所不辭。