過來人身份幫隊友慳醫藥費

初入保險界,唔少經紀都會「打友誼牌」拉客,作為本地籃壇代表,劉凱濤為免影響波友感情拒向隊友「埋手」,不過他以過來人分析,認為保險可以幫到經常於比賽埋身肉搏的運動員慳番不少醫藥費。

劉凱濤又打籃球又做保險又返學,但未影響球會福建及港隊的訓練,被問及會否向隊友Sell保險時,阿濤就「耍手擰頭」:「有時會向隊友提及,但絕對唔會逼佢哋,唔想中間有誤會,影響隊友或朋友關係。」

不過縱橫球場多年,僅得183磅的阿濤就因骨瘦如柴經常受傷,他希望以此經驗幫番隊友:「打波其實好易整親,跌打同物理治療費用都好高,我覺得運動員應該有份保障畀自己。」