安東尼老婆艷照流出

NBA勞資談判仲未傾掂數，不過喺停擺期間班球星就好關照傳媒，連環爆出兩單猛料。紐約人球星安東尼「希哥」上身，唔見咗手機搞到老婆LaLa Vasquez嘅艷照流出，嚟緊隨時仲有裸照跟住曝光，佢兩公婆難免日日擔驚受怕。至於小牛球星史杜積高域仲大劑，竟然背妻偷嗒AV女，婚姻正式亮起紅燈！

唔少球星都喺休季期間出戰地區賽事保持狀態，本身擁有個人聯賽嘅安東尼都唔例外，早排就拉大隊去華盛頓打友誼波，但由於當時場面太混亂，大批球迷湧入場問「甜瓜」攞簽名，有球迷就順手牽羊偷咗佢兩部手機，家陣終於出事嘞。

兩部手機被偷內存裸照

據美媒《Media Take Out》爆料，佢哋日前收到封電郵，入面全部都係安東尼老婆LaLa嘅艷照，懷疑寄件人正正係偷咗「甜瓜」手機個賊仔。有好料送上門，美媒前晚就掟咗幾幅LaLa戴住胸圍同埋半裸嘅性感相上網，真係畀人睇蝕晒！

消息指《Media Take Out》並冇公開晒全部相，估計佢哋同個賊仔仲擁有部分LaLa嘅裸照，以及大堆安東尼嘅短訊資料。32歲嘅LaLa有頭有面，一旦批裸照被公開肯定轟動全美，籃網前鋒堪富利斯個老婆Kim Kardashian就試過出重金買番佢餅春宮帶，唔知安東尼又肯為老婆使幾多錢呢？

安東尼就話唔小心，史杜積高域就衰賤格！呢位34歲嘅塞爾維亞3分射手，本身已經有個希臘名模老婆阿莉卡，點知個衰佬仲要沙沙滾，畀美媒《TerezOwens》踢爆偷嗒AV女郎施雅娜。呢位AV女日前透過Twitter自爆同史杜積高域幽會，仲露骨大讚佢陽具夠勁添！