劉少維 百二磅肥仔被壁變型男
「我細個時真係勁樣衰，超蠢！」此番說話出自港隊壁球型男劉少維（Dick Lau）的嘴巴，絕對毫無說服力。不過事實歸事實，現在高大威猛、迷倒萬千少女的Dick Lau，小時候為肥仔一名，曾因過肥被杯葛、自我封閉，甚至肥到跌在街上「爬唔番起身」。如今走出童年陰影，Dick Lau笑稱全因壁球令他變「靚仔」！圖/文: 徐慧華、曾詩
身高178cm、體重75kg，擁model身形的劉少維，絕對係香港壁球壇的首席型男，但今時今日Dick Lau依然擁有「咸肥」的花名，原來出自癡肥的童年。「細個真係超肥，有次教練想叫我減肥，但卻在白板上寫錯『咸肥』，這花名就一直跟到依家。」
Dick Lau 8歲已擁120磅的肥仔身形，跑步跑最尾，每日食飯卻食足7餐，他笑稱小時候與嫲嫲同住，每隔15分鐘就有得食，令他身形暴肥：「中一加入港青時，肥到跑第尾，打波更係最屎嗰個，試過肥到喺街跌低起唔番身，成日都被人排斥，又畀隊友玩，不過好正常，依家我見到肥仔都唔理佢哋啦！」
15歲奪港青開竅
雖然樂觀回憶童年，但當日口中的「死肥仔」確實為他帶來不快回憶：「以前做咩都縮，咩都匿埋自己，覺得自己樣衰，長期都將頭髮剷青，gel頭都唔識。」「死肥仔」轉捩點在於15歲首奪港青冠軍：「初中開始大伯見我肥，逼我跑步減肥build up自信，一跑就跑了兩年，慢慢體能好咗，瘦咗又拉高咗，去到15歲突然贏晒平時輸開個班人，先發現自己原來係得嘅！」
一句「我係得嘅」！亦令Dick Lau曾經變得狂妄自大，虛度青春：「中五畢業後加入港隊，又唔使返屋企住，又有人工，又瘦咗，就開始識得分番條中間界，可以去玩去識女仔，哈哈。」Dick Lau形容當時感覺像「放監」，令他一度浪費多年青春，直至23歲發現戶口「長期糧尾」，家中因金融風暴經濟受衝擊，加上接觸基督教後，才懂得生性做人。
宗教令自己發奮
「壁球及宗教改變了我，如果無打壁球，我現在一定做個好肥嘅普通人；當年東亞運前半年當上基督徒，令我發奮地練習，如果唔係，我可能仲係咁低能、咁自大。」
現在的劉少維，除擺脫肥仔帶來的陰霾，他亦承認「型男」一詞由內而來，「到現在我都唔會覺得自己型，根本細個到依家都唔會有人讚我，但我可以講，我打壁球時的樣子係OK的，哈哈。」「咸肥」也好、「死肥仔」都好，做回自信的Dick Lau才稱得上今日的「壁球型男」。
劉少維小檔案
出生日期：85年12月20日
身高/體重：178cm/75kg
全職年份： 2004年
目前世界排名：81
威水史：
2010年‧廣州亞運男團銅牌
2009年‧香港東亞運男單金牌、
男雙金牌、男團金牌
2007-2010年‧
香港錦標賽男單冠軍
