周洋「認錯」歸隊嚴重抑鬱
「王濛打交」事件有新進展，日前王濛被「踢」出隊後，另一冬奧金牌得主周洋即提出退隊，但有消息話，喺冬管中心採取極端手段強迫下，盛傳患咗嚴重抑鬱症嘅周洋，終於喊住「認錯」歸隊。
李琰開腔「王春露都要炒」
國內傳媒報道指出：「班領導為逼周洋就範，叫咗佢父母嚟北京，既向領導認錯，又勸個女歸順。結果搞到周洋一直以淚洗面！」眼見好友咁慘，王濛曾忍唔住發咗條微博鬧爆冬管中心：「可唔可以唔好再逼周洋喇，你哋仲係人？叫佢認錯？佢錯喺邊度？人都快畀你哋逼瘋，簡直厚顏無恥。」不過周洋迫於壓力，前日朝已經返咗去中心「認錯」，但佢身體狀況好唔掂，暫時都唔可以正常訓練。
至於總教練李琰就首次開腔，指摘領隊王春露應該都要「炒」。事關佢令到成隊唔團結，影響隊員情緒，嚴重干擾訓練。
周洋在冬管中心強迫下「認錯」。（資料圖片）