王濛無緣冬奧呼冤

中國「速滑天后」王濛因打領隊被革扯兼禁賽，昔日英雌變過街老a鼠，佢日前接受央視訪問首次公開想爭冬奧3連冠嘅激勵紋身，可惜一份無限期罰單令夢想幻滅，呢位性情中人一時感懷身世，仲呼冤話「運動員其實係個弱勢群體」！

中國運動員紋身唔多見，最「揚」算係網球一姐李娜同羽球帥哥蔡贇，但原來王濛比佢兩個更誇張，直頭將自己紋埋上手臂：「中國可能覺得紋身唔係太好，其實呢個係鼓勵我自己嘅紋身。」個紋身原型來自佢錫冬奧金牌嘅相片，下面清楚寫上To Be Continued（未完待續），再加個五環標誌。

「運動員其實係個弱勢群體」

好明顯，27歲嘅王濛想喺2014冬奧再續神話：「佢（紋身）話我知，我一定得，一定可以繼續創造歷史！」點知連環打交事件令呢位天才選手幾成絕望。「我選擇返嚟想為國爭光，依家乜嘢比賽都停咗，咁我奮鬥動力又係咩呀？判罰結果令我面前冇晒光明……」大爆「青島事件」係領隊王春露郁手在先嘅王濛愈講愈Down：「我哋由細離開父母、缺少文化教育同培養，運動員其實係個弱勢群體。點解班領導唔講句說話，乜都由我哋承擔。」