《福布斯》睇好李娜做No.1富婆

據美國《福布斯》最新公布嘅「世界十大最高收入女運動員」排名榜，網球天后足足佔據7席，當中人氣爆燈嘅中國金花李娜排第8，《福布斯》專家更估計「娜姐」擁有逾13億中國同胞嘅龐大市場支持，有望於來年反壓「搵銀天后」舒拉寶娃，成為最豬籠入水女運動員！

排行榜根據運動員薪金、獎金同代言酬勞等年收入計算，頭十位富婆總收入逾1.1億美元（約8.58億港元），當中以李娜嘅身價飆升得最勁！年屆29歲嘅「娜姐」今年勇奪法網冠軍後人氣急升，獲平治、勞力士及Haagen-Dazs代言合約送上門，目前以800萬美元榮升「第8富婆」。

韓杜荷娃拍年曆籌款

據《福布斯》估計，李娜今年嘅場外收入將超過1,000萬美元，有力威脅舒拉寶娃嘅榜首位置。該位俄羅斯美少女去年與NIKE續約，加上獲多個國際品牌支持，成功以2,500萬美元收入連續7年做賺錢一姐，比次席嘅禾絲妮雅琪賺多一倍！

至於網壇靚女韓杜荷娃最近就專程到摩納哥取景，拍攝名為「韓杜荷娃2012th」年曆（下圖），為柬埔寨嘅愛滋病（HIV）兒童籌款，暫定今年秋天面世。呢位斯洛伐克球手話：「世界上好多兒童唔似我哋咁幸福，佢哋需要更多人幫助。」