福建南華搶食超聯尾胡！

究竟福建能衞冕成功，還是南華奪得今季首冠？超級聯賽2011決賽今日上演！睇超聯，球迷當然睇外援。南華兩大「高佬」夏里遜及馬古斯蘭特利，在NBA搵過食零舍不同，實力超班。不過，福建有布福特和科華斯帶住打，加上主將司徒偉傑揚言要以渣巴「天勾」力抗對手，超聯決賽，今午修頓料有一番惡鬥！（無綫翡翠台周六下午2:45直播）

布福特馬古斯蘭特利爭3分王

於上場「金至尊盃超級聯賽2011」福建、南華大戰，雙方都派專人「招呼」外援。經過一場埋身肉搏，一眾華將似乎很有心得。面對身高達2米13的前溜馬中鋒夏里遜，福建主將司徒偉傑笑言要用渣巴絕技「天勾」應付：「數年前曾得渣巴過兩招，講解『天勾』絕技，今次面對前NBA球星，也許可以大派用場！」

至於負責緊盯上屆MVP布福特的南華前鋒陳浩明，亦參透出對付外援秘訣：「經過上次一役，我發現他們小動作特別多，只要專心一點，應該冇問題！」今季從福建轉投南華的中鋒惠龍兒，與外援同聲同氣，充當翻譯的同時更獲益良多。南華今屆成「三料亞軍」，Duncan當然想為球隊贏番尾彩！

季軍爭奪戰永倫鬥飛鷹

除了球隊鬥，一班球星在個人榮譽亦繼續拗手瓜！馬古斯蘭特利和布福特分別以14和10球在三分球榜上領先，今日會爭奪最佳三分射手獎，此外，賽事亦設最有價值球員獎。

頭場方面，季後賽總冠軍永倫會與飛鷹爭奪季軍。賽事門票昨日預售，所有優惠票均已售出，現僅餘180張正價80元門票，今早10時續在修頓出售，每人最多限購3張。