師傅教路練好下盤腳腳七注

盧比度第一次「打功夫」就有板有眼，難怪身為「師傅」的鄭家豪不停豎起大拇指，激讚「徒弟」快上手，控腿動作好、雙手有力，最適合練刀術，在旁的Chino聽見後即說：「好呀好呀，我就用刀對付費托啦！」表情「得戚」又搞笑！

百忙不忘弘揚武術

不少外國人喜歡中國武術，家豪以前隨港隊赴歐洲作交流活動時亦教過洋人舞刀弄槍，只是講到教足球員，今趟才是第一次：「外國人初接觸武術會好驚，覺得郁手郁腳，難得盧比度咁鍾意同投入，佢本身係運動員，意識好，拳、腳甚至長、短兵器都學得好快。尤其係佢踢開波，四頭肌發達，一般人未必做到嘅控腿動作難唔到佢，另外佢隻手力量夠大，劈刀嗰陣好有勁度，唔錯、唔錯！」

家豪認為多練下盤功夫對足球員有一定幫助：「見過廣州武術隊啲人下樁夠穩，射波腳腳七注，其實唔同項目交換玩吓會從中學到新事物，作為輔助練習亦無妨。」自去年5月被調往合和公路基建任職項目發展主任後，家豪就忙到不可開交，每周3天上廣州工作，周六、日又要參與推廣體育發展，但仍會抽空客串教拳，今次「拔刀相助」指導盧比度，他亦話「好Enjoy」:「畢竟對我嚟講，弘揚中國武術係一種使命！」

後記：同事大晒冷睇片有驚喜

今次邀得兩位重量級體壇明星拍照及訪問，機會難能可貴，因此《太陽體育》採訪部當日幾乎「大晒冷」，紛紛提早返回公司幫手。更難得的是，兩位採訪對象初次見面也十分投契，令採訪過程事半功倍。如果嫌小記文筆未夠好，大家不妨瀏覽ONTV網站，click一click有關今次訪問的短片，擔保會有意外驚喜。