蔡芳裕挑戰柱仔退休紀錄

香港「單車天王」黃金寶去年亞運以37歲高齡奪金人人「嗌勁」，本地籃壇37歲「長人」蔡芳裕同樣「愈老愈精彩」！日前協助永倫成就甲一Playoffs總冠軍「三連霸」的他，不僅以助教身份獻計，後備上陣更建奇功，難怪「阿裕」未有退休念頭：「最好梗係追平吳柱業（41歲退休）紀錄啦！」至於「柱仔」亦睇好後輩能夠「超越」自己。

征戰甲一籃壇18載的蔡芳裕，上周五於Playoffs終極Game 5第2節登場，即轟入10分打破僵局，絕對是永倫擊敗南華捧盃的功臣之一！由於自己仍有「弗爆」狀態，「阿裕」坦承未想言休：「我哋曾經喺Game 3同Game 4輸畀南華，當時就懷疑過自己係唔係有能力再打落去；結果Game 5一節內攞到10分，證明我未係時候退休，但一切都要睇球隊仲需唔需要我！」

讚舊隊友吳柱業球員典範

講起籃壇「長青樹」，「阿裕」表示不得不提97年稱霸亞洲冠軍球會盃時的威立舊隊友吳柱業，亦希望從對方身上「學到嘢」：「『柱仔』的確係一個典範！其實作為籃球員，33歲後就會走下坡，但佢Keep得好好，當年打到38歲仍有良好狀態全因夠自律。有樣嘢係我喺佢身上學到，而且畢生受用嘅，仲記得嗰陣時同佢出外比賽，就算夜晚練到凌晨一點先瞓，佢第二朝都會晨早8點準時起身，食完早餐再去跑步健身！我好想試吓挑戰佢41歲先退休嘅紀錄。」

Keep fit關鍵早起做Gym

當年15歲已打甲一、期間兩度引退後復出，至41歲才正式收山的吳柱業認為：「要做『長青樹』人人都可以，最緊要係生活檢點，早睡早起，定時做Gym練波，莫講41歲，打到43、44、45歲都OK！」問及蔡芳裕的「籃球生命」可否衝破40大關，「柱仔」不消一秒就說：「佢喺永倫一定得！『阿裕』打5號位（中鋒）仲好硬淨，食得住對手，而且隊波人才濟濟、配合好，佢唔使兼顧咁多嘢，打多幾季絕冇問題。」