揀女友要鍾意食 型男劍客貪吃拒做Model

身高1米88、身材健碩、天生一副Camera face；型到爆炸的張小倫絕對是Model好材料，只是誰想過眼前這位帥氣大男孩，小時候竟是200幾磅超級肥仔！原因好簡單，只因一個「食」字！「為食」，不但令「小倫」拒當模特兒，甚至變成選擇女友的一項首要條件！

初中愛食麥記變200磅肥仔

「細個食到癲咗呀！」一講到食，「小倫」就興奮到極點：「屋企樓下就係麥當勞，時時刻刻瞓醒就麥當勞，返學又係麥當勞……」難怪他發育期身形暴脹，初中時代身高僅1米6、體重卻達200磅！「有個暑假的起心肝減肥，每日踩單車、打籃球、跑步，先至成功瘦身，結果新學期返到學校幾乎冇人認得我！不過，我到依家都仲好鍾意食麥當勞㗎，一星期有3、4次做消夜，哎呀，平日練習完好快就肚餓嘛，夜晚冇嘢食就叫麥麥送囉！」

為吔漢堡包走去打工

既然愛吃到如此地步，何不去麥當勞打工？「我真係做過㗎！當年初入港青冇人理，心灰下有成半年唔打劍，走去學煮嘢，期間就喺麥當勞做，貪有得食……」估不到一句戲言竟換來這個答案，妙極！

當然，張小倫「為食」奧炒之處又豈止「麥當勞情意結」！讀書時代曾被邀拍廣告的他，縱有齊做Model條件，但仍堅拒向這行發展。「玩吓就無所謂，以前都試過拍硬照，全職嘅話無興趣，因為聽啲Model朋友講，唔單止冇啖好食，每次出Show前仲要扣喉，食完即刻去廁所……咪睇佢哋台前好風光，台後不知幾慘情。」

「小倫」還強調不會揀模特兒做女朋友：「我女友一定要鍾意食！試過同女仔出街，食餐飯本來好正，但佢食兩啖就唔食、話飽喎，太浪費喇，咁樣好冇意思啫！」這位型男劍客何止「民以食為先」，簡直就是香港體壇「食神」！