預祝26歲生日 願望進軍倫敦奧運

「我想攞2012年奧運入場券！」採訪當天，下周一（18日）便滿26歲的張小倫，突然收到細佬送上「早來的」生日蛋糕，既驚喜又感動，並即場許下進軍倫敦的生日願望，他謂經廣州亞運一役後經已「升呢」，自覺「依家同個個都有得打」，對爭取奧運參賽資格充滿信心。

完成亞洲賽回港後，「小倫」下周就會同朋友飛到泰國旅行度生辰：「以前年年生日都出外集訓或比賽，今年難得有假放，所以一早就上網訂機票去玩！旅行有咩做？我呢啲……梗係飲飲食食啦！」他表示今年生日願望比以往多，除想與家人「聚多啲」、身體健康外，更重要的是實現倫敦奧運夢！「之前幾站計分賽都爭到少少分，下半年比賽好關鍵。全世界爭32個名額其實好困難，基本上要排到亞洲Top2先有機會，不過自己都有信心。」

亞運輸金牌贏寶貴經驗

事實上，廣州亞運奪亞為張小倫整個劍擊生涯注下強心針。記得比賽當天，「小倫」於4強以1劍刺走世界「一哥」中國名將雷聲，決賽跟南韓崔秉哲又打到14:14平手，可惜「小倫」最後輸1劍痛失金牌，但這面銀牌對他而言已彌足珍貴。回想那場生死戰可有「揼心」感覺？「唔會！過咗去就OK，比賽總有贏有輸，已學識拎得起、放得低，上到場就唔記得，打番好下一仗先緊要。」反而身旁的「阿勝」就戥阿哥「唔抵」，還說在家看直播時「好想打爆個電視機」！

也許，「輸金牌、贏經驗」才是張小倫亞運之行最大得益。「嗰場劍輸咗啲運，自己當時出汗太勁，計分器Detect唔到，我應該去換劍……不過從細節中學到寶貴經驗，令我提升了一個Level，依家就算打世界賽，我唔覺得輸梗，個個都有得打，好似我哋（港隊）上個月喺南韓一個比賽都贏到歐洲傳統勁旅法國入8強啦，所以，只要狀態好，我可以超越任何人。」