為食張小倫劍神變廚神

「劍神」教你「煮飯仔」！別以為入得廚房、出得廳堂只有女士先做到，本周《齊來玩過界》主角「劍擊王子」張小倫及其細佬張偉勝（阿勝），兩位大男人就擁有10多年廚藝經驗。牛高馬大的小倫特別「棄劍揸鑊鏟」，教大家用$150煮出三餸一湯，令今集「美男廚房」色、香、味俱全！

要用$150煮三餸一湯對大家可能是個難題，但自小因父母外出工作，負起「煮飯仔」任務的小倫及阿勝，卻能在兩小時內僅用$150有找的價錢，煮出海鮮大餐，包括：薑葱炒蟹、蠔油雞翼、西蘭花鮑片及魚頭豆腐湯，豐富程度令在場「等食」的記者「流晒口水」。

小倫雞手鴨腳做細佬助手

兩兄弟於訪問當日首先「兵分兩路」出擊，阿勝負責諗菜式，小倫則同一眾師奶逼街市買餸兼講價，最終以$148買好材料後，就殺入廚房攜手「落鑊」！

兩位大男人逼入「的骰」廚房，穿上圍裙沒半點尷尬，小倫開始前更興奮大叫「正呀！好耐無同細佬一齊煮嘢食喇！」事實上，兩兄弟在廚房內亦默契十足，小倫負責洗菜，在利苑擔任二廚的阿勝則快手快腳將材料切好準備「開火」。

近年因練劍絕少落廚的小倫，難免間中雞手鴨腳，拍蒜頭更拍到「成地都係」，要細佬從後提醒：「拎條布包住拍啦！」小倫面對「威嚴」的細佬，亦收起「大佬」風範，在旁「偷食」之餘，亦乖乖擔任細佬助手。

享受過程10年後開私房菜

「煎、炒、煲」，阿勝短短個半鐘已經將薑葱炒蟹、西蘭花鮑片及魚頭豆腐湯煮好，更額外即場包皮薄餡靚的小籠包及鍋貼給記者品嘗，壓軸出場的小倫則表演最拿手的蠔油雞翼，準備工夫有板有眼的他，一將雞翼落鑊即搞到「熱油四濺」，令到在旁忙着睇火的細佬皺晒眉頭趕至「撲火」。幸好，小倫最終還是順利完成菜式，與細佬同枱品嘗自己的「傑作」。

「嘩！正呀！」未將細佬美食放入口，小倫已急不及待講出其「口頭禪」，但他享受的是與細佬難得的「兄弟樂」：「細個我成日同細佬一齊煮飯，但近排太忙已成個月無見面，今次可以一齊煮嘢食，食咩其實都無所謂，因為我實在好享受煮嘢食嘅過程，因為可以增進我哋嘅兄弟感情。」

跟劍擊一樣，最令小倫着迷的不是成敗帶來的虛榮，過程才是烹飪的精髓：「買咩餸同用咩調味料都由自己決定，成功時會相當開心。」

受母親廚藝薰陶，身為客家人的小倫及阿勝自然最叻煮客家菜，阿勝的廚藝更令一家五口經常在家「印印腳」等食，不過最愛中餐濃味菜式的小倫，卻不希望細佬滿足現狀：「細佬煮嘢食係好好味，特別佢整嘅楊枝金露，但我做大佬嘅，經常都會畀啲意見佢，希望佢趁後生學多些不同菜式，不被現時嘅中菜所局限，為我哋10年後一齊開私房菜鋪路。」

兩兄弟「出生入死」感情好

除了「煮飯仔」外，小倫亦最愛戶外活動，同細佬一樣「膽生毛」：「我哋四兄弟姐妹自細感情都好好，我同細佬從未鬧過交，成日周圍玩，試過喺內地，瞞住阿爸阿媽喺懸崖10米高跳落海度。」細佬在旁不忘補多句：「嗰時斜少少都死得呀！哈哈！」兩兄弟自小「出生入死」，感情好得令在場記者羨慕，不過相信更令各位妒忌的，是小記有幸品嘗兩位俊男的廚藝，試食後好味到只能用三個字形容：「正、正、正！」

認識張小倫

原名：張漢倫

（18歲父親為他改名為張小倫）

出生日期：

85年7月18日

身高：188cm

體重 ：188磅

劍擊項目：花劍

劍擊年資：10年

加入港隊：2004年

威水史

‧2010年廣州亞運會花劍個人銀牌、花劍團體銅牌

‧2009年亞洲錦標賽花劍團體銅牌

‧2008年亞洲錦標賽花劍團體銅牌

‧2008年全國冠軍賽系列賽第2站花劍團體銀牌

‧2004年泰國公開賽花劍團體金牌

‧2004年亞洲青年錦標賽花劍團體銅牌