懸跳之王9奪世界冠軍

塞翁失馬、焉知非福，絕對係「懸跳之王」杜基寫照！呢位現年36歲的哥倫比亞選手，雖然緣慳92年巴塞隆拿奧運，卻登上更高「懸崖舞台」跳出一片天，唔單止9奪世界冠軍殊榮，生涯「最激一跳」仲被拍成電影，堪稱懸崖跳水代言人。

奧運夢幻滅轉練懸跳

杜基自小愛足球，但每次踢完波都會去睇人哋練跳水：「10歲嗰年某日，有個跳水教練問我試唔試吓跳，當時有啲驚，但最後都答應，第一次喺3米彈板上跳落水……」就係咁樣，杜基展開佢跳水生涯，仲好快「愈跳愈高」，由3米跳到10米。

92年只有18歲嘅杜基，原本順利入選哥倫比亞奧運隊，點知因為跳水隊唔夠經費去唔成巴塞隆拿，令佢奧運夢破滅，之後心灰意冷「退休」走去讀大學，並開始轉練懸崖跳水。95年杜基喺家鄉首次表演「懸跳」，97至99年暑假期間又喺維也納野生動物園出Show，由25米高吊車跳入泳池，亦試過喺28米高直升機上獻技。

杜基「懸跳」生涯中最高一次係05年挑戰34米高懸崖，而且被拍成電影《9Dive》。究竟懸崖跳水有咩快感？「跳之前嘅繃緊壓力，同跳完之後浮上水面嗰種身心舒暢嘅感覺形成強烈對比，不止挑戰自我極限，有時甚至超越極限。」