黑夜跳水帶旺旅遊業
懸崖跳水瘋狂又危險，可謂「跳嘅心驚、睇嘅好激」，墨西哥著名海濱度假聖地阿卡普爾科，就靠「懸跳Night Show」吸引唔少遊客慕名而至，帶旺當地旅遊業，甚至有人話，呢班職業表演選手先係名副其實「夢之隊」！
燃點火把劃破夜空
阿卡普爾科嘅懸崖跳水始於1934年，歷史悠久，為增加官能刺激，佢哋將起跳舞台設置喺一處高出海平面35米嘅懸崖之上。旅遊旺季時，每日都安排5場表演，除中午時分唯一日場外，其餘4場都會等夕陽西下嗰陣先會開Show，當中最激就係夜晚10點半上演的壓軸戲，觀眾看台設喺幾隻遊艇上，當鑼聲響起，表演揭開序幕，表演者手持火把，沿住遊艇台階跳入水，游向山崖邊向上爬，再喺各自指定位置一個一個開始Show time，此時再次燃點嘅火把就劃破漆黑夜空，場面壯觀又美麗。