懸崖跳水搵命博！

嘩！好驚呀！講嘅係懸崖跳水（Cliff Diving）！各位想像吓，喺廿幾米高懸崖峭壁一躍而下，仲要做出連串高難度動作，然後不消3秒直插入水，時速高達180公里似足飛車撞牆，嗰種場面幾咁震撼！選手個個搵命博，難怪「懸跳」被列為10大瘋狂極限運動之一，絕對唔係「You jump, I jump」咁簡單！

提起跳水，大家一定會諗起中國「夢之隊」，熊倪、田亮、伏明霞、郭晶晶更加係泳迷永遠偶像，不過講到近年喺歐美愈嚟愈受歡迎嘅懸崖跳水，中國竟然係「零接觸」，京奧冠軍陳若琳啟蒙教練高峰透露國內根本冇人去練：「懸崖跳水基本規則同普通跳水差不多，但高度太高，入水衝力太大，太危險喇！而且仲要考慮埋天氣、風速等自然環境，太多唔確定因素存在。」

被視為瘋子式自殺舉動

事實上，「懸跳」喺發展初期就被視為「瘋子式自殺舉動」，但偏偏不斷吸引愛尋刺激嘅「瘋子」向極限挑戰。97年7月首次舉辦世界懸崖跳水錦標賽，當時有嚟自美國、加拿大、墨西哥、英國、丹麥、前南斯拉夫同瑞士共12個選手參加，近年喺紅牛冠名贊助主辦「世界盃系列賽」嘅推廣下，懸崖跳水已經成為具收視保證嘅主打極限運動。

雙腳入水免腦部受衝擊

據「懸跳」賽事規例，男選手起跳高度距離水面23至28米，女將18至23米，入水點水深最少5米，難度系數可達5.0以上，而且運動員一定要用腳入水，事關人喺入水嗰刻，水對身體衝擊相當於開車以每小時180公里時速撞牆，亦係由10米高台跳落嚟嘅9倍。所以，如果好似普通跳水咁用「倒立式」入水，腦部會受到過大衝擊；9屆世界冠軍杜基（Orlando Duque）透露：「40米已經係一個極限，再高嘅話人體就承受唔到，包括皮膚同內臟都會受重創。」

猛烈撞擊賠上性命

懸崖跳水作為「玩命運動」，當然有發生過死亡慘劇，曾有選手同水面撞擊後嚴重內傷，但自己唔為意，結果喺參加下一站賽事途中突然吐血，最終身亡。難怪身經百戰如杜基都承認：「雖然從事咗『懸跳』事業咁多年，但我仲未完全適應，每次企喺懸崖望落去，心跳依然快到嘭嘭聲！」