壁球雙花揸Cue鬥一番

炎炎夏日少女們當然最驚烈日當空被曬得一臉雀斑，但若果又想運動又想避開紫外線，歎住冷氣keep fit，桌球自然是不二之選。今期《齊來玩過界》就請到兩代壁球界天后趙詠賢及陳浩鈴，首次棄拍揸Cue，踏入桌球室向「金銅子」陳國明「拜師學藝」，首嘗Snooker新體驗。

趙詠賢（Rebecca）及陳浩鈴（Joey）於壁球場上征戰多年，無論球速幾快都難逃兩人球拍，不過今次面對「慢半拍」的桌球，要二人靜靜地「篤波」，就幾乎難倒兩位亞運獎牌得主。

為了令Rebecca及Joey上堂桌球速成班，《齊來玩過界》就找了2屆亞運團體金牌功臣陳國明收兩位為徒，由揸Cue姿勢、角度及力度等方面入門。獲得「陳師傅」精傳10多年Cue技的Rebecca及Joey，學成後即場上演激鬥，玩轉桌球室。

陳浩鈴左手有着數

雖然兩位壁壇代表的「篤波」笑料層出不窮，但「國明」盛讚二人對桌球甚有天分：「Rebecca同Joey本身都係運動員，比其他女仔初學者來說上手較快，不過聽前輩話左手球員聰明點，現在世界職業球手好多都是左撇子，所以Joey打桌球或有着數。」經過今次《齊來玩過界》比併後，Rebecca及Joey一個贏實際、一個有姿勢，雙方握手言和啦！

趙詠賢烏龍百出

Rebecca及Joey的「友誼賽」獲得陳國明擔任球證以示公平，不過兩位壁壇代表「上場」後多次打出烏龍波，由於二人激戰一小時後仍僅各入3隻紅球，「國明」決定臨時改例，以最快打入10度者獲勝。原本領先的Joey，後段因太大力錯打Pink波，令一度打到白波飛起、又將白波「撻死」的Rebecca有機可乘，最後於波枱上發揮「小旋風」本色，遠枱打入一記紅波，以10:7反敗為勝；輸波的Joey則被「大師姐」烏龍百出的球技引得捧腹大笑。

壁球及桌球無獨有偶均於冷氣房內進行，但平日練波閒閒哋打足3小時的Rebecca及Joey，篤波僅一小時已大喊背脊痛，閒時有觀看好友傅家俊比賽的Rebecca說：「睇波見到他們比賽好似好輕鬆，但支Cue其實好長好重，又要對準角度出球，所以要好用力捉實支Cue，令到手臂及膊頭的肌肉拉得好緊好痛。」Joey則因此愛上桌球，認為適合一大班朋友及女仔玩，對消除「拜拜肉」更大有幫助。