Darryl做主持變gag王

歐陽若曦喜歡新嘗試，最近「踩入公仔箱」擔任電視台汽車節目主持，不僅將車文化帶給觀眾，更憑風趣性格變成「搞Gag王」，Darryl表示很高興有機會一展所長，希望透過對賽車的認識推廣賽車運動，讓大家知道駕車其實不只是「一個地方去另一地方」咁簡單！

平時駕着戰車風馳電掣的「波子王」，跳出賽道主持節目為車迷帶來新鮮感，他坦承這比賽車更困難：「每次都要好長時間準備，好彩車係我興趣，做落唔算太辛苦。其實節目形式都係幾個主持傾偈，氣氛輕鬆，我只係做番自己就可以。」

周末出戰捷克站

對於好友兼拍檔的「表現」，著名F1評述員「丹尼爾」讚不絕口，還封Darryl做「冷面笑匠」:「雖然佢喺加拿大長大，講中文麻麻哋，但間唔中講一句好爆，個樣又夠卡通鬼馬，絕對係節目嘅『搞Gag王』，Darryl喺主持呢方面可塑性好高。」

今季於世界房車賽多次踏上頒獎台的「波子王」，本周末將出戰捷克站賽事，他盼能在福地再爭佳績：「去年咁多個分站中，我喺捷克站鬥得最好，希望今次可以延續強勢。」