阿英為囝囝唔再飛車

人生在不同階段有不同目標，就連嗜好和生活習慣亦會改變，「有子萬事足」的陳敬然為愛兒陳靖捨帆而去，更放棄「飛車生涯」，由「辣嘢」福士第6代Golf TSI換了部「好Family」的三菱七人車，儘管新座駕冇型冇款，卻是「英爸爸」歷來揸過最舒服、最窩心的戰車。

訪問當日坐上「阿英」架新車就聽見兒歌樂韻飄揚，他急不及待解釋：「之前播過陳奕迅，點知阿仔唔鍾意，大叫大跳，所以我架車只可以播兒歌，咁佢先坐得定……」「風之子」說着說着，還手舞足蹈跟隨輕快旋律「哼兩嘴」。

清理尿片嘔奶衫一樂也

跟大部分男士一樣，「阿英」也是愛車之人，從20歲考到車牌以來幾乎年年換車，Rav 4四驅車、古典Mini、Mini Cooper S、福士GTI、福士第6代Golf TSI……一部比一部「型」；不過個多月前宣布退役後，陳敬然「反璞歸真」用4、5萬蚊買了部「平凡七人車」，他自爆是聽到前輩黃德森一句「想做好爸爸就換車」而「醒覺」:「仔細老婆嫩，我都要為家人着想，唔想再開快車，以前畀人Challenge Cut線當然唔會讓，依家？『你咪行先囉』！」

「老婆、家人同其他朋友都話坐七人車夠闊落，好舒服，載住一家大細去放狗、游水，感覺好Warm！」坦言希望將來同乖仔一齊享駕車樂的「阿英」，座駕內除有兒歌碟、玩具車和嬰兒車外，竟還發現「靖靖」用完的尿片和「嘔奶衫」！只見「英爸爸」清理車廂時仍自得其樂、一臉幸福！