風之子鍊贏波子王

炎夏殺到，《太陽體育》今起推出夏日特輯，頭炮「齊來玩過界」送上「當風之子遇上波子王」！自細愛飛車的亞運風帆冠軍陳敬然（阿英），趁周六香港「F1路演」前，膽粗粗「試揸F1」挑戰「HK車神」歐陽若曦（Darryl），看似冇得鬥竟又被「風之子」爆冷鍊贏「波子王」，究竟點解？！

紅牛為F1路演造勢，早前安排2部F1模擬器（Simulator）駛勻各區流動展覽並供車迷試玩。剛宣布退役重返校園的陳敬然尚未開學，最近「得閒到爆」，突然挑起條賽車筋，話要變身「車神」Show Quali，於是本報出面做媒人，撮合「阿英」同Darryl「鍊番轉」。

澳門賽道大鬥法

兩位在各自領域同樣追求速度的香港頂級健兒雖不太熟稔，但一見面即「雞啄唔斷」，自言從未打過賽車Game的「阿英」坐上部「Sim」充滿好奇，被軚盤錶板「N咁多」按鈕搞到頭都大；Darryl就氣定神閒，與在場技師講Set up，還不忘為陳敬然教路：「最緊要記熟條賽道，邊個位入彎、邊個位踩Brake……」

經過3圈練習，比賽正式開始，「阿英」揀賽道前問：「你邊條冇咁熟？」Darryl得戚答：「我條條都好熟喎……吓，你揀澳門？呢度係我Home court呀！哈哈哈……」兩個廿幾30歲大男人，玩起來似足細路仔，童真盡露，一個叫：「救命呀！撞牆快啲o架！」一個嚷：「乜你咁快嘅！咪撞我啊！」

阿英靠蠱惑秘技勝出

憑着「撞牆唧快啲」的「蠱惑秘技」，「阿英」踩落濠江街頭全程「唔Dup Brake」，起步即拋離「規規矩矩」、做足「收油入彎零撞牆」的Darryl 10幾秒；「鍊」完3圈後，中途試過「炒到飛起」的「風之子」造出6分20秒465佳績，以3.853秒爆冷飆贏曾經「單手揸軚」、以6分24秒318衝線的「波子王」!

「好正、堅過癮！」「阿英」獲勝後未見「鬆毛鬆翼」，倒顯得有點不好意思，記者要求擺出「Yeah爆勝利手勢」，他都說：「低調啲、低調啲！其實個Game Pre-set咗，我係咁撞先去得快；Darryl表現得好Pro，不愧係香港No.1賽車手，我根本唔係佢嗰皮，我向來唔睇F1，反而有留意房車賽，10年前睇本賽車雜誌就認識歐陽若曦，覺得佢好勁。」「阿英」還說玩完Simulator後更明白做賽車手「一啲都唔簡單」：「佩服、佩服！」

Darryl大讚上手快

至於老貓燒鬚的Darryl亦表現大方：「輸咗唔會Hard feeling，大家都係玩吓啫，我早前一個人玩試揸上海賽道，今次同陳敬然對打，先知呢個Game原來撞吓先唧快啲，鬥到尾段我試過『偷橋』，可惜追唔番！」他又大讚「阿英」賽車意識好：「佢好集中精神，快上手，Top運動員都有呢種本能。」眼見兩人識英雄重英雄，記者打趣提議「擇日重賽」，由Darryl「棄軚盤玩風帆」向陳敬然「復仇」，「波子王」即開懷大笑：「要喇、要喇！」