勝利船愈跳愈有電

日本球迷出名熱情又投入，打氣嘅時候，好鍾意成班人跳住咁為愛隊加油，於是神戶勝利船高層諗到引入「床發電系統」（地板發電系統），實行將球迷跳起、落地造成嘅震盪力，轉化為電力供應畀主場用，例如照明系統之類，而且咁樣發電係全球首創，可以話係環保先驅。

跳住睇波轉化為電力

上年3月7號日職開鑼，勝利船首次試用贊助商開發嘅「床發電系統」。當然啦，入場球迷唔係每個都跳住睇波，所以發電系統主要集中安裝喺龍門後嘅忠實球迷區域，呢班超級擁躉一邊跳嘅時候，球場大屏幕會顯示出比賽期間球迷「跳」出嘅電量，等佢哋可以知道自己有幾落力打氣。

睇番報告，勝利船3月對京都不死鳥，電量係每秒8,400W，跟住4月對山形山神係每秒5,380W，然後5月對磐田山葉係每秒9,680W，經過3次試用數字都相當理想，所以勝利船喺7月正式宣布，以後每場主場都會利用「床發電系統」發電，依家勝利船球迷睇波，都要同球員一齊出汗，梗係更有歸屬感啦。