球圈環保救地球

時興講環保，日乙球隊熊本羅亞素都唔執輸，趁住東日本大地震帶嚟嘅能源危機，推出一個食用廢油發電計劃，以後佢哋主場踢夜波，其中一座照明泛光燈就會用Fans捐出嘅廢油發電，既慳電又減排，一舉兩得。

嗌咗進軍日職口號好多年嘅熊本，講實力、成績真係唔多上得大枱，但係今次個食用廢油回收計劃，就真係畀佢哋攞晒彩。熊本响6月7號宣布，同熊本縣體育振興事業團、崇城大學、Straight Plant Oil Project BIGMAN携手合作，由呢個月12號對FC東京起嘅3場主場賽事，都搞食用廢油回收，球迷只要攞樽500毫升嘅廢油，送到指定閘口收集，就會獲贈一張7月17號對富山勝利嘅B級座位波飛，仲有件紀念品送添，搞環保之餘，仲順手谷埋人氣。

廢油換波飛

但係唔係乜嘢油都可以回收發電嗰噃，熊本列到明只有油菜籽油、粟米油、紅花籽油、麻油、沙律油、橄欖油、大豆油、葵花籽油同棉籽油至得，用過或者過期都OK，不過礦物油、牛油、豬油、沙甸魚油、棕櫚油、椰油呢啲响常溫會凝固嘅就唔得。

提供1座泛光燈電源

熊本為咗谷呢個Project，仲做足晒數據添，佢哋攞咗日乙開咧戰對FC橫濱為例，原來當日用電連觀眾揸嚟嘅車，每個球迷等於製造咗1公斤嘅二氧化碳，依家推行個食用廢油發電計劃，以後佢哋每次打夜波，熊本縣民綜合運動公園陸上競技場嘅4座泛光燈，其中有一座會用環保油發電，起碼喺用電嗰瓣，除咗慳電慳錢，仲會減排4分之1，算係咁喇。