馬蒂克網壇Lady GaGa

Lady GaGa襲網壇！美國女將馬蒂克一向以「出位」戰衣博搶鏡，她昨日自稱打扮靈感來自樂壇超級巨星Lady GaGa，更揚言會有「再爆」形象在傳統典雅的溫網亮相，球迷記緊留意！

預告「再爆」新裝溫網亮相

着過性感黃金戰衣等奇裝異服出賽的馬蒂克，今次以美式足球look亮相，粉紅Tee+及膝黑襪，雙眼下貼上黑色防曬貼，她承認是從Lady GaGa身上取得靈感，更自稱是「網壇的Lady GaGa」：「我覺得佢有好多瘋狂構想，好有個性。我唔知下次會唔會着肉製網球裙，我有諗過將塊煙肉擺上膊頭，但唔知喺太陽底下可唔可行。」05年因戴上牛仔帽出戰美網而被罰款的馬蒂克又說：「我會喺溫網有新裝，相信球迷懂得欣賞所有嘢。」

剛於女單次圈以2:1淘汰列卓高的馬蒂克，是自威廉絲姊妹於06年後，首位躋身法網32強的美國女將，她於新公布的世界排名上將超越V威廉絲，成為美國「二姐」。馬蒂克下仗將面對塞爾維亞名將珍高域。