占士好火踩綠軍唔識射波

被視為季後賽次圈最強戲碼的熱火對塞爾特人，昨日打到「火」紅火「綠」收場！雙方於這場東岸冠軍前哨戰幾乎開大片，全場處下風的「綠軍」更有皮雅斯被逐，最終熱火主場以99:90贏波，先拔頭籌，賽後勒邦占士繼續寸爆，辣盡塞爾特人及紐約人！

昨仗火藥味濃，占士、韋迪、保殊及皮雅斯合共吃下5次技術犯規，當中皮雅斯更於第4節與韋迪發生衝突後被逐，除令落後的「綠軍」雪上加霜外，雙方球員更幾乎開拖，好在「老大哥」加納特及占士及時將隊友分開，否則情況將一發不可收拾。熱火以韋迪表現最Sharp醒，貢獻全場最高的38分，加上應屆「3分王」占士鍾斯射入5個3分波，終以9分之差砌低「綠軍」，總比數領先1:0。

灰熊炒雷霆延續老8傳奇

塞爾特人除了攻入25分的雷阿倫表現對辦之外，其餘隊友的投射命中率合共不足38%，賽後占士向《紐約時報》記者碧克（@HowardBeckNYT）表示：「我都唔知佢哋（塞爾特人）橫掃紐約人嘅系列賽係點射波，比賽應該好似60年代咁唔防守。」雙方明早合演Game2，熱火主場再讓5.5分唔算多，料可再下一城，捧上盤。

另邊廂，西岸8號種子灰熊延續神奇季後賽之旅，昨憑蘭度夫貢獻34分及10個籃板，作客以114:101大勝雷霆。