熱火反勝Fans興奮暈低
憑藉3巨頭勒邦占士、保殊及韋迪合力轟入63分，熱火在一度落後14分的劣勢下，主場幾經辛苦以97:89反勝76人，季後賽首戰旗開得勝。之不過今戰焦點反而落在場外，兩位熱火球迷分別暈低及被波鞋飛中，認真無陰功！
楊格飛鞋掟中球迷
昨仗熱火於第2節5分31秒首次取得領先優勢，令主場球迷陷入瘋狂狀態，1位坐在第1層看台的球迷因興奮過度突然暈低，場館軍醫急忙趕至施救，並以擔架將該名球迷抬出場外治理。
戰至第4節中段更發生一段小插曲，當時楊格上籃被祖爾安東尼踩甩波鞋，該名76人前鋒為趕及回防，竟將球鞋擲向觀眾席並掟中1名熱火球迷，隨即被全場球迷報以噓聲。
76人力戰而敗，全場獲得的罰球足足比熱火少24個，然而教練杜格哥連斯卻決定忍口：「我唔敢批評球證，到時畀聯盟罰款我就冇錢供啲孫仔讀大學！」熱火方面，教練史普斯達承認球員輕敵，明早再鬥76人定會打醒十二分精神，讓9.5分照捧上盤。
保殊（左）射入全場最高嘅25分，助熱火旗開得勝。（美聯社圖片）