柔情泰臣為養鴿搬去賭城
野獸都有柔情一面？！咪睇前重量級拳王泰臣無惡不作兼獸性暴戾，原來係個天生愛鴿狂，仲喺屋企養咗3千隻白鴿咁多，但因佢住嘅鳳凰城有「私人最多只准養40隻白鴿」嘅法例，「護鴿心切」嘅泰臣惟有搬去對養鴿毫無限制嘅「賭城」拉斯維加斯，細心築棚，仲花大量時間「培訓」班鴿認路返屋企：「我會一直養活佢哋，直至我死。」呢段「人鴿情未了」真係窩心到爆！
培訓班鴿鬥快飛返屋企
泰臣細細個已經同白鴿好有緣，第一次打架都係因為有人整死佢隻鴿。泰臣遲啲會喺全新一輯《Animal Planet》電視真人騷，同全國「養鴿達人」鬥一番，比併邊個啲鴿最快飛返屋企：「為咗訓練佢哋，我每朝好早起身，然後揸車載鴿去離家幾里外鍛煉記性，同練拳差唔多，需要好大耐性。」呢個名為《Taking on Tyson》嘅節目會喺3月6號首播。