占士開火還擊惹眾怒

熱火三巨頭之一的勒邦占士，即使已離開舊東家騎士，仍自信其至高無上地位無可取替！據美國《ESPN》爆料，騎士後衞吉遜前晚於生日Party上自封為「新大帝」，然而占士收到風後卻「唔抵得」，2人竟於Twitter隔空開火，「理事長」占士連舊隊友言論都要管，難怪如此犯眾憎！

占士轟口出狂言

昨日25歲牛一的吉遜，前晚提前開Party大事慶祝，兩位知情人士及後向《ESPN》透露，該名騎士射手整晚心情高漲，敬酒致詞期間更自封為騎士「新大帝」，豈料熱火球星占士卻「聽唔入耳」，認為對方一直想取代其位置，並透過Twitter含沙射影窒吉遜：「我聽到尋晚有人喺Party口出狂言，其實我一早就察覺到，依家總算認清我哋之間嘅關係。」

生日都要被人窒，深深不忿的吉遜不甘示弱，隨即連環留言展開還擊：「抱怨人哋嘅言論就好似抱怨電視節目唔好睇，但又要揸住個遙控器。」及後吉遜又稱：「人生苦短，何必要介意人哋嘅言論。」擺明指占士多管閒事。

騎士Fans撐吉遜

其實2人不和早已有前科，去年12月熱火與騎士交手時，占士本想到騎士後備席博Friend「呃偈傾」，誰知黑面吉遜不領情並指占士為人虛偽，表面與舊隊友稱兄道弟，實際就勁反骨。由於2人於Twitter合共有15,000名「追隨者」，「大帝」為免開火言論成為焦點，昨日留言稱2人誤會已經化解，但有騎士球迷就留言撐吉遜，並準備發起第2次燒「大帝」波衫行動，足證占士乞人憎。