灰熊三心兩意影響軍心

灰熊教練賀連斯今季將射手美奧貶做後備，揚言希望該名王牌球星以第6人姿態落場，又曾強調無意送走美奧。然而賀連斯卻講一套做一套，昨晨決定以美奧交易溜馬前鋒麥羅拔斯，奈何雙方因討價還價未能在限期前完成交易，令轉會爛尾收場。

班主向記者認衰

球會班主希斯利隨即向記者湯馬臣（＠christomasson）表示擔憂：「美奧知道球會想將佢送走，我真係唔希望呢件事會影響到隊波。」其實灰熊早排亦表態想送走蘭度夫，誰知昨晨又開天索價，謂要勒邦占士級數的球星才可打動會方，並逐一拒絕列強的交易提議，勁混吉！

灰熊動作多多，可是最後只能從火箭手中獲得老將柏堤亞回巢及控衞伊斯美史密夫，並以中鋒泰亞拔、卡路爾及1個首輪選秀權作交易。送走泰亞拔可算是灰熊最醒目決定，事關這位去季榜眼一直未能打出水準，今季場均只得1.2分及1.7個籃板，難怪有休斯敦記者怒轟火箭高層：「柏堤亞係火箭隊長，有資歷有實力，為乜要換泰亞拔呢件廢物返嚟？」