劉翔跑7秒55再摘銅
啱啱喺德國首站奪得60米欄季席嘅中國「欄王」劉翔，尋晚轉戰第2站卡爾斯魯厄室內賽，保持平穩狀態，喺第一組初賽輕鬆跑出7秒68晉級，及後決賽喺第6線起步，最終以7秒55衝線再摘銅牌，美國勁敵奧利華以7秒40大熱奪冠，法國巴斯古第2，只係快過劉翔0.02秒。
身為賽事孭飛明星，「劉天王」受到高度關注同「特別照顧」，唔單止成為官網焦點圖片主角，仲獲組委會安排一部奧迪A8名貴房車接送，地位真係超然！小Sun睇到中國田徑總教練馮樹勇喺微博話：「同行有四十幾個運動員，只得劉翔一個享受到呢個待遇，可見組委會對劉翔嘅重視同佢喺德國嘅影響力。」馮樹勇仲話去到酒店後，有幾個「翔粉絲」準備好相同紀念冊喺度等「劉天王」攞簽名，Fans仲話等咗成3年添！
劉翔（左）喺決賽跑出7秒55再次奪得一面銅牌。(美聯社圖片)