古辛斯打隊友入硬雪櫃
「冇波掂就打人！」帝王新星古辛斯，昨日因不滿隊友當迪格連未有傳球給他作最後一擊，竟在更衣室揮拳怒打對方，面臨被球會內部停賽3場！
冇得射最後一擊發爛渣
話說昨日帝王主場對雷霆，完場前落後2分的帝王，小前鋒當迪格連選擇將波交予泰拉基伊雲斯作最後一擊，可惜其3分外投射失，最終帝王亦以97:99落敗。然而美國體育記者Sam Amick（@samickAOL）隨後在Twitter爆料，指帝王「一年生」古辛斯認為自己當時處於較有利位置，應該負責最後一擊，在通道內先與伊雲斯發生口角，繼而在更衣室內與當迪格連上演「全武行」。
由於事態嚴重，原本已上機準備今日帝王作客太陽的古辛斯，被球隊總經理彼德趕落機禁止隨軍，外傳更將被帝王內部處分掟入雪櫃－停賽3場，前途未卜。
古辛斯（中）早啲入多兩分咪唔使輸波囉。(美聯社圖片)