高比魯域斯基威脅唔打NBA

NBA「明星賽周末」本周展開，同樣鐵定在洛杉磯舉行的勞資談判亦屬焦點，一旦談判破裂隨時令來季賽事「搞唔成」。有洛城記者爆料，湖人球星高比拜仁決定企硬，怒罵列強老闆賺到盡之餘，更考慮會去意大利落班！

新一輪NBA勞資談判將於「明星賽周末」期間進行，球員工會領袖、巫師後衞軒域治及熱火球星勒邦占士將領導一眾勞方出席。據估計，由於本季NBA將虧蝕3.7億美元（約28.8億港元），資方代表準備提議削減球員大約3分1人工，建議觸怒所有NBA球員。

魯域斯基考慮打CBA

據洛杉磯記者汀格（@KevinDing）爆料，湖人王牌高比拜仁絕不屈服，被問到會否考慮到歐洲搵食，「小飛俠」表示：「我一啲都唔抗拒！」高比拜仁指出，新的勞資協議對年輕球員的合約有很大影響，作為前輩有義務維護年輕一代的利益。高比拜仁向記者透露：「資方所提出嘅建議根本係垃圾，球員為球會賺過咁多錢，但佢哋反而指摘球員貪錢，點都講唔通！」

事實上，一向百足咁多爪的高比一早已「推銷」自己謀定後路，早前為土其耳航空公司出任代言人表演廚藝，預計未來半年將在超過80個國家播映，力爭更多「搵外快」機會。至於小牛球星魯域斯基更坦言對勞資雙方談判已作最壞打算，必要時會考慮轉投CBA發展。明日湖人將作客山貓，高比為展示自己值錢地方，相信必施展渾身解數，讓6.5分上盤可期！