南韓澳洲1:1握手言和
南韓尋晚喺亞洲盃C組同澳洲賽和1:1，入球功臣係被國際足協選入2011年13個最具潛力新星嘅具滋哲，今屆佢為南韓包辦3個入球，風頭勁過同樣有份入選嘅日本新10號仔香川真司。
日本險勝沙特提早出局
澳洲球員賽前為昆士蘭水災死難者默哀，又着上印有呼籲捐錢救災字樣嘅T恤，可惜佢哋喺24分鐘被具滋哲門前接應池東沅橫傳射入，落後0:1返更室。易邊後17分鐘，積甸拿克接應尼爾高波頂入為澳洲扳平，和波後兩隊同樣兩戰得4分。畀韓國傳媒吹到係「未來施丹」嘅入波功臣具滋哲，據講一直苦學英文，估計好快就會外流搵食嘞。
另邊廂，前晚B組賽事日本對敍利亞，兩隊分別有門將川島永嗣同後衞沙巴治被逐，而且各得1球12碼，結果日本靠長谷部城門前補中同本田圭佑極刑中鵠險勝2:1。賽後兩隊球員分別喪圍球證，埸面失控，贏波嘅日本更向亞洲足協投訴。同組沙特阿拉伯以0:1不敵約旦，兩戰全敗提早出局。