Marco提早慶生超驚喜

Marco提前賀壽「超驚喜、勁開心」！香港「桌球天王」傅家俊周六（8日）才度過33歲生辰，不過前晚（周二）率先收到女友Shirley送來一份花盡心思的特別禮物——神秘生日Party！讓Marco與近40位好友歡度感動又窩心的晚上，昨日再帶着興奮心情登機，飛返英國準備周日（9日）展開的大師賽。

昨晚赴英備戰大師賽

Shirley上月開始籌備派對，又用多張舊相片自製生日卡，只想為男友送上驚喜；結果，當一直蒙在鼓裏的Marco被「騙」往舉行Party的私人會所，開門見到眾好友包括港隊隊友、娛圈友好陶大宇和蘇志威等齊唱生日歌時，果然開心到有點不知所措，不停傻笑、揮手，但亦不忘給女友一個甜吻、一個擁抱，還深情講句：「你真鬼馬！」氣氛溫馨、冧爆全場！

「呢幾日都覺得佢（Shirley）古古怪怪，但冇諗過係咁樣。好開心，真係好Suprise，好難忘！」收到不少禮物的Marco當晚心情勁靚，更High到將「壽包」笠上頭：「對上一次開生日會已經係5歲喺麥當勞嗰陣，不過都冇今次咁多人，近10年打職業賽，過生日仲經常喺英國，或者坐緊飛機呢！雖然今年『正日』都唔喺香港，但內心絕對唔寂寞！」傅家俊透露生日願望是身邊好友個個健康快樂，自己就減肥成功，回復至Fit身形。