亞運健兒聖誕祝願 Make a Wish

香港隊喺廣州亞運表現勁爆，贏番嚟嘅獎牌就好似「人氣App遊戲——推銀仔」咁多到滿瀉！不過，呢班狂掃8金15銀17銅嘅亞運英雄，喺獎牌背後嘅付出真係難以想像，所以難得今日係平安夜，當然要暫時拋開刻苦訓練嚟個大解放慶祝，《太陽體育》亦連續兩日將呢份喜悅同大家分享！10位「80、90後」獎牌得主將率先登場，仲齊齊大玩Cosplay着起聖誕衫，同各位《太陽》讀者講吓自己有乜聖誕願望！

吳安儀★想過白色聖誕

桌球女子6個紅球團體金牌、

單打銅牌

•我自細就認為落雪嘅聖誕節先夠正宗，所以一直好想過一個白色聖誕，但咁耐以嚟都未試過！最慘係我啱啱先喺敍利亞打完世界業餘賽返嚟，如果遲番一星期就達成夢想，好可惜呀！

葉蘊妍★勁收祝福好滿足

桌球女子6個紅球團體金牌

•其實我係一個好容易滿足嘅女仔，今次亞運同世業賽返嚟後，已經收到好多朋友嘅祝福同禮物，真係好開心o架！如果要講願望，咁我就想同所有關心我嘅人一齊去歡度佳節啦！

蘇文欣★狂食聖誕大餐

桌球女子6個紅球團體金牌

•為咗好成績，近日我已經積極減肥令狀態更Fit！不過聖誕佳節當前，確實好難忍口，所以我嘅願望係想喺無後顧之憂下食一餐豐富聖誕大餐，如果食幾多都無影響就最好！

黃蘊瑤★過「普通人」生活

單車女子記分賽銀牌

•我哋班單車運動員為咗訓練同比賽，基本上一年內有11個月時間都係與世隔絕，同「一般人」脫晒節！所以我嘅願望係想過番啲「普通人」生活，可以接觸多一啲新事物、或者係讀多啲書，例如經濟方面我就好有興趣去鑽研！

李嘉維★陪女友度假

空手道男子

75公斤級銅牌

•唔少運動員都想趁聖誕出外度假，但我反而想留喺香港同家人、女友度過！因為近幾年聖誕為咗空手道陪唔到佢哋，難得今年亞運後有長假，當然要珍惜機會。

劉彥恩★想睇金字塔

游泳女子4×100米

混合泳接力銅牌

•我自細都好鍾意埃及，好想去睇吓金字塔、獅身人面像等古蹟！不過呢個願望今年聖誕一定實現唔到，因為我依家已經飛咗去日本旅行嘞，埃及之旅留番下年啦！

張小倫★退役後做廚神

劍擊男子花劍個人賽銀牌

團體賽銅牌

•除咗劍擊之外，我最鍾意嘅就係食嘢，如果我退役之後，一定唔會再從事有關劍擊嘅職業；反而想做飲食業，做個「花劍廚神」，拍住我做廚師嘅細佬一齊專攻內地龐大飲食市場！

李慧詩★到耶路撒冷過節

單車女子500米計時賽金牌、

爭先賽銅牌

•聖誕對我呢個基督教徒嚟講係好重要，但由於要兼顧比賽同訓練，所以07年到依家都無再喺香港過聖誕，今年亦唔例外！不過，我嘅聖誕願望當然係想喺聖城耶路撒冷度過，但呢個夢想相信要等我退役之後，先會有「假期」嚟實現！

馬希彤★巴黎鐵塔過節好浪漫

游泳女子4×100米

混合泳接力銅牌

•我好想聖誕喺巴黎度過！因為巴黎鐵塔好靚同好浪漫，如果再加埋喺嗰度唔使畀錢任玩、任買、任Shopping就最好，咁就一定可以拋低晒所有壓力及煩惱！

鄭曉為請爸媽去台灣旅行

劍擊女子花劍團體賽銅牌

•雖然我只係得15歲、同埋仲係學生，但今次喺亞運我得到5萬蚊獎金。咁大個女第一次「出糧」，喺今個聖誕我決定要做個孝順女，請爸爸同媽媽去台灣旅行，一家人玩番餐就最好嘞！