姚明長抖火箭升空

火箭球星姚明近日因為再度受傷提早收咧，令好多中國球迷好傷心，不過火箭冇咗佢影響係咪真係好大？朱楓就一啲都唔覺得，反而覺得火箭冇咗姚明，球隊更加可以專心應戰，話唔定會成為今季復甦嘅關鍵。

自從2002年以狀元身份加盟NBA後，火箭同姚明可謂畫上一個等號。不過睇番數據，火箭自姚明加盟後，幾乎未試過打入季後賽次圈，前屆殺入西岸4強已經係絕無僅有。無可否認，擁有健康嘅姚明，火箭內線無敵，可惜依家呢個姚明已經今非昔比，好似季初復出後，姚明每場都獲得幾十分鐘上陣時間，可惜火箭卻錄得5連敗劣績，之後亦輸多贏少。

老實講，姚明近年經過咁多次大型傷患，根本冇可能可以重返以前嘅水準，火箭之前仲畀佢打正選，或多或少只係想安慰班球迷，但其實對火箭成績根本冇幫助，反而火箭冇咗姚明之後愈打愈好，對上6場取得5勝1負，接近季後賽席位，完全反映外間成日講姚明出唔出得，的確幾影響火箭其他球員打波嘅心情，朱楓覺得如果真係想為火箭同姚明好，分手未必唔係好事！