老費寸拿斯尼戴頸箍係女人

「曼阿大戰」下周二凌晨爆發，波都未踢紅魔鬼就連環辣火頭！眾所周知，喺英超搵食嘅外援最怕凍，近排英國仲要落埋雪，搞到英超球壇突然湧現「頸箍幫」。費格遜尋日就率先開炮，話帶頸箍踢波係女人所為，即係寸拿斯尼唔係男人啫！

艾拉諷兵工廠好睇唔好食

拿斯尼呢排弗到爆燈，型爆保暖頸箍Look更加成為潮流，偏偏爵爺就睇唔過眼，據英國《太陽報》爆料，佢老人家已經禁止一眾紅魔做「頸箍幫」：「真正嘅男人唔會帶啲咁嘅嘢落場，同我除晒佢！」費Sir咁講，即係話拿斯尼係乸型喳喎！

費Sir吠完輪到艾拉吠，呢位曼聯左閘雖然係法國人，但依然句句有骨，寸爆話由同胞雲格領軍嘅阿仙奴冇冠軍相：「兵工廠只係球星培訓基地，佢哋踢波係好睇，但攞唔到獎盃有咩用先？曼聯嘅爭標對手始終係車路士。」一個二個都咁寸嘴，阿仙奴班球員唔火滾就假咯，睇嚟呢場「曼阿大戰」肯定充滿火藥味。