雲達華治嫂膺最受歡迎WAG

維多利亞統治WAG時代結束！最近網站Kickettes發起調查，選出最受全球網民歡迎WAG，結果雲達華治靚老婆施維爾，擊敗屈居亞軍嘅碧咸嫂維多利亞登上冠軍寶座。C朗女友伊蓮娜更加輸到唔見影，入選唔到最佳WAG嘅11人名單，睇嚟球迷對於維多利亞同伊蓮娜嘅高調作風，經已開始覺得煩厭。

維多利亞屈居次席

調查有超過1萬個網民投票，曾經用意志戰勝乳腺癌嘅施維爾大方得體，雖然佢喺電視台工作又拍過寫真，但從來唔會扮上流人，最近仲話開始識得同英國狗仔隊相處，唔似得維多利亞出街例黑面。而且佢同老公勁恩愛，之前雲達華治轉會漢堡為咗遷就老婆做嘢，留喺皇馬係要等施維爾安心醫治乳腺癌，兩公婆感情好到咁，又真係抵人羡慕嘅。

排第3位、第4位分別係形象更低調嘅費蘭度托利斯老婆，同埋沙比阿朗素太太，佢哋都甘願做老公背後嘅女人。至於卡斯拿斯、謝拉特同卡卡另一半，就分別排第5名至第7名，朗尼嫂麥露蓮倒灶排第8位，可能係曝光率太高導致反效果，但點都唔夠C朗名模女友伊蓮娜陰功，前11名都唔見影，證明未得到球迷認同。