黎海榮揮桿練心理質素

黎海榮（Alex）十月初夥拍「極奇妙」征戰日本，奪得日本短途馬錦標，成為近年首位喺海外勝出國際一級賽嘅香港騎師，揚威國際為港爭光。呢位27歲馬場紅人，最近「踩過界」學玩高爾夫球，莫非佢想做馬場活士？

Alex策馬揚鞭拉頭馬你就見得多，揸桿揮桿卻係初哥，雖然佢自幼接受騎術訓練，馬步紮實手瓜起(月展)，但係打高球仍處於練習開球階段，不時被取笑「連個波都打唔起」。問教練佢資質如何，換來答案係「好難講」，看着Alex十球有四、五球唔知打咗去邊，佢亦不禁苦笑，但很快又專注練習，運動員應有嘅刻苦堅毅同體育精神，黎海榮一一具備。

黎海榮係體育迷，騎馬固然係首本戲，游水、籃球、乒乓波佢都唔曳，小時候更係乒乓球校隊成員，近期接觸高爾夫球，就係覺得高爾夫球同騎馬有好多相似之處。

同馬主打波有助增坐騎

「每樣運動都有本身嘅技巧，高爾夫球睇就容易，到自己打嗰陣其實好難，高球同騎馬都講求定力，亦可以訓練心理質素。例如揸球桿，你愈大力揸支桿，就愈難打得好，騎馬亦都一樣，愈緊張就愈容易出錯。」

黎海榮笑說，學打高球仲有另一好處：「我師傅練馬師何良打高球好勁o架，好多馬主都熱愛高球，所以我更加要苦練，佢哋先會搵我打番幾場，可能仲會畀多啲馬我騎！」

究意黎海榮距離成為「馬場活士」仲有幾遠？佢話上次落場玩吓，點知一個洞打咗八桿！佢嘅第一個考驗好快就到，就係嚟緊月中約戰「阿叻」陳百祥喺高球場決高下，黎海榮格言係「落得場一定想贏」，所以佢會勤力練習，到時要剝「阿叻」棚牙。