嚴寒暴雪踢祖記出局

意甲災難日降臨！祖雲達斯尋日喺攝氏零下15度冰天雪地下，只能夠作客逼和列治普斯納1:1，分組賽5戰全和黯然告別歐霸盃。祖記教練迪尼利話，大雪令白界都睇唔到，暗示畀歐洲足協玩死，更慘嘅係意甲球隊喺歐霸盃佗衰家，搞到歐洲賽積分系數已落後德甲一大截，好有可能保唔住4個歐聯席位！

今季狂燒錢擴軍嘅祖記，踢歐霸盃完全唔上力，呢場波開賽氣溫係攝氏零下11度，波蘭漫天飛雪搞到祖記唔識攻，更喺12分鐘被列治普斯納嘅魯迪尼夫斯頭槌攻破大門。跟住大雪愈落愈大，積雪甚至令球場白界線「消失」，氣溫再降至零下15度，情況就好似提早過聖誕，一片白茫茫。

僅贏兩場勢遭德甲取代

最後祖記只能夠靠伊亞昆達近門射入扳平，改變唔到出局命運，列治普斯納爆大冷喺A組出線；至於曼城就主場以3:0大勝薩爾斯堡，同樣穩奪出線席位。賽後迪利尼埋怨，歐洲足協准許比賽繼續離晒大譜：「如果天氣唔係咁，我哋可以贏波，連白界都睇唔到，正常情況比賽應該腰斬至啱。」

其實祖記出局主要係唔爭氣，之前連和4場冇得怨人，迪比亞路5場分組賽踢足450分鐘入得1球，更加係致命傷。另外，森多利亞會長加朗尼拗頸雪藏卡斯辛奴，結果喺I組主場以1:2輸埋畀燕豪芬，羞家執包袱出局，未計今日凌晨巴勒莫同拿玻里嘅賽事，今屆意甲4隊出戰歐霸盃分組賽得2場勝仗，認真樣衰！

由於歐洲賽積分系數，由歐聯同歐霸盃成績相加而成，祖記帶頭冚旗後，截至周三為止，意甲以56.552分落後德甲嘅63.270分，照咁發展，2012/13年球季意甲會同德甲位置互換，即係話，到時意甲歐聯席位由4個減剩3個，所以話祖記慘淡出局唔止冇面，仲可能連累意甲淪為歐洲弱勢聯賽，害人不淺。