澳門格蘭披治開騷(目及)實3星
澳門格蘭披治開騷(目及)實3星
第57屆澳門格蘭披治大賽車今日揭幕，3大賽事格蘭披治三級方程式大賽、FIA世界房車錦標賽東望洋大賽及格蘭披治電單車大賽開跑，車迷除咗可以一連4日欣賞精彩刺激嘅比賽，仲可以參加喺西灣湖廣場舉行嘅澳門美食節，賽車加美食，直情係五星級享受！
澳門格蘭披治三級方程式賽車，一向係車手進身一級方程式賽事嘅踏腳石，以往成功車手多不勝數，09世界冠軍畢頓、舊年開始喺F1賽場奔馳嘅日本車手小林可夢偉，都曾經喺06年獲得澳門三級方程式冠軍。今屆參戰嘅車手好多都已獲一級方程式車隊關注，例如有歐洲三級方程式冠軍莫他拿、英國三級方程式冠軍禾克同日本三級方程式冠軍國本雄資咁。
今屆賽事焦點除咗一眾新星，首位角逐整季FIA世界房車錦標賽嘅華人車手歐陽若曦亦相當有睇頭，憑住佢對東望洋跑道嘅熟悉，有望衝擊一個分站冠軍。另一本港車手張煒安亦會出戰格蘭披治電單車賽。