舒麥加勒夫讚維度爾贏自信

德國新車神維度爾前晚在阿布扎比贏得個人F1生涯首個總冠軍，賽後興奮不已的他聲言，至今仍對封王感到難以置信。外號「舒麥加二世」的他所取得的成就，即時令舉國歡呼，一代車神舒麥加與德國國家足球隊領隊勒夫先後公開祝賀，其祖家小鎮赫本罕多達1,500名Fans目睹維度爾死敵阿倫素以第7名過終點後，更陷於瘋狂狀態。

雖然一向不喜歡「舒麥加二世」的外號，但維度爾卻是完美地繼承了車神的位置，回想在比賽最後階段，他笑言根本不知道冠軍會落入他手中：「喺最後10個圈，我嘅工程師羅基一直建議我要安全揸過終點，我當時都諗緊點解佢會咁緊張。到佢哋話我聽做咗世界冠軍，我開心到根本唔知講乜好。」

阿倫素服輸唔賴用錯戰術

對於小師弟繼承衣鉢，舒麥加亦興奮表示：「對佢嚟講呢個冠軍贏得絕對唔輕易，賽季中佢狀態起起跌跌，但都一一捱過，表現非常傑出，我真係戥佢開心！」至於勒夫則代表德國國家隊發表祝賀，讚賞佢嘅卓越天分、信心同自律，話呢次係個偉大勝利。

另邊廂，臨門「撻Q」飲恨而回只得總亞軍的阿倫素，對於被指落敗源於車隊戰術過分針對維度爾紅牛隊友韋伯一事，出面力撐：「賽車就係咁，賽後再講戰術運用梗係輕鬆啦！無論如何，我只想祝賀紅牛同維度爾，但我哋出年一定會捲土重來。」