老泰利遭熱刺躉打爆頭

雖然俗語有云：不招人妒是庸才，但估唔到車路士隊長泰利就因為咁而連累到爸爸特德．泰利當街畀人打。特德．泰利日前畀幾名熱刺球迷毆打兼撞穿咗個頭，好在治理後冇乜大礙，不過泰利當然嬲到震，話嗰幾個人根本唔配做球迷。

泰利震怒插施襲者

話說上周六熱刺輸咗畀保頓之後，幾名熱刺嘅球迷喺火車站度見到特德．泰利即時上前圍毆佢，其中一名戴住熱刺頸巾嘅球迷仲將老泰利個頭撞落條鐵柱度，班球迷散去之後，頭破血流嘅老泰利喺接近無知覺嘅狀態下被送到醫院，治療後已經返咗屋企休養。

據泰利一名親友透露，泰利對呢件事感到非常震驚同傷心，認為嗰幾名「所謂球迷」，因為佢係同市宿敵嘅球員而傷害佢爸爸，根本唔配稱得上做球迷。不過，事件亦可能另有內情，事關曾因販毒被判緩刑嘅老泰利，喺事發後拒絕向警方提供任何線索，而警方只表示事件暫被列為傷人案處理。