恩沙基斷韌帶不言退

長青恩沙基挑戰不死傳奇！嚟緊周一凌晨「米蘭打吡」戰前AC米蘭收到沉重噩耗，近況大勇嘅恩沙基十字韌帶斷裂提早收咧，對一個37歲老將嚟講無疑係為足球生涯宣判「死刑」。偏偏恩沙基有異於常人嘅精奇體魄，連主診醫生都話佢身體不老，恩沙基亦誓言唔會退休，下年強勢回歸！

恩沙基周中對巴勒莫勇戰受傷喊住離場，尋日AC米蘭證實：「恩沙基左膝十字韌帶斷裂兼半月板重傷，醫療專家緊急商議後決定做手術。」據報恩沙基手術後最少抖半年，由於佢已37歲，加上今次係佢足球生涯第3次嚴重受傷，收山似乎係唯一出路。

安帥撬馬甸尼上「車」

然而恩沙基向來打不死，報道話「米蘭實驗室」同佢做過腦電波兼神經肌肉測試，發現恩沙基嘅神經感應特強、體魄異於常人，主診醫生禾比亦詫異：「恩沙基嘅年齡唔係問題，佢嘅身體保養得出奇咁好，出現併發症機會唔大，絕對可以東山再起！」

AC官網亦以「恩沙基一定會返嚟」為標題報道事件， 據報原本季尾約滿嘅恩沙基將獲球會新約以示鼓勵，恩沙基自己亦信心十足：「今次挑戰好困難，但我唔會放棄，我保證你哋會再見到我企喺球場上面！」

恩沙基想繼續馳騁沙場，同期隊友馬甸尼就走上神台好耐，嚟緊仲有機會去英超發展，《鏡報》指車路士突然炒咗助教韋健士後，安察洛堤已欽點馬甸尼過嚟幫手，蘇拿就係後備目標。